انت الوحيد اللي من الناس راغبك

ياماحلا البرّ به سجّة البال
تنسى هموم الزمان ومصايبك
والنار قدمك على جالها دلال
وجنبك حبيبٍ من اغلى حبابيك
بوسط النفل يمشي ابعزٍ ويختال
بزينه اللي قد له سنين سالبك
ومن الفرح تجرّ لك احلى موال
ويردّ لك موالٍ بصوت يطربك
كل الجروح تروح لا ضحك ثم قال
انت الوحيد اللي من الناس راغبك
خلّ القروش وخلّ تطريد الاموال
وانسى الهموم اللي بسرعه تشيّبك
هاذي طراة الروح والقلب والبال
والعمر يقضي ولا تقضي مطالبك