لا تلتفت لي وأنت قلبك مع الغير
لا تلتفت لي وأنت مانت بمعايه
خلك مع اللي صنت له كل تقدير
اللي من اجله بعت باقي غلايه
صحيح يلقى الشر من يفعل الخير
حكمه و فيها صاب راع الروايه
توي تجرحت الندم و التحاسير
لا واحسايف ياعناي وشقايه
عطني دلايل للتجافي وتبرير
والدافع اللي يدفعك في جفايه
مني حشى ماجاك نقص وتقصير
ولا هقيت ان منك هذا جزايه
ولاصار هذي نيتك واصل السير
تلقى وأنا القى من بيجبر عزايه
ما فيه داعي للاسف والمعاذير
واصل جفاك ولاتحاول رضايه
و أناعلي لا صخر القلب تصخير
عنك وعندي للإهانه وقايه
من باعني بعته ولا فيه تفكير
وجفوى المقفى للمولع حمايه
وأنا خلصت ومنك شفت التعازير
واللي حصل لي منك فيه الكفايه
